សហរដ្ឋអាមេរិក៖ ព្យុះព្រិលដ៏៏ធំមួយបានបោកបក់មកលើសហរដ្ឋអាមេរិកនៅសប្តាហ៍នេះ ដែលបាតុភូតធម្មជាតិនេះនឹងបង្កឱ្យមានការធ្លាក់ចុះនូវសីតុណ្ហភាពត្រជាក់ខ្លាំងបំផុតនារដូវកាល Christmas ដែលមិនធ្លាប់មានក្នុងរយៈពេល ៤០ឆ្នាំចុងក្រោយ នៅតាមតំបន់រដ្ឋមួយចំនួននៃសហរដ្ឋអាមេរិក។

ព្យុះព្រិលដ៏កំរនេះបានបោកបក់ចេញពីភាគពាយព្យនៃមហាសមុទ្រប៉ាស៊ីហ្វិកកាលពីថ្ងៃអង្គារ នឹងបានបន្តធ្វើដំណើរទៅទិសខាងកើតដែលនឹងបង្កជាព្យុះស៊ីក្លូននៅថ្ងៃសុក្រនេះ។ ប្រជាជនប្រមាណ ៩០លាននាក់ ត្រូវបានព្រមានពីកត្តាអាកាសធាតុចុះត្រជាក់ខ្លាំងនៅរដ្ឋចំនួន ៣៧ ទូទាំងសហរដ្ឋអាមេរិក។ ប្រមាណជា ៨០ភាគរយនៃប្រជាជនរបស់អាមេរិក និងត្រូវទទួលរងអាកាសធាតុត្រជាក់ -០សូម្បីតែរដ្ឋដែលស្ថិតនៅភាគខាងត្បូងដ៏ឆ្ងាយដូចជារដ្ឋ តិចសាស់ក៏ដោយ។

ព្យុះនេះត្រូវបានគេហៅឈ្មោះថា Elliot ដែលជាការរងសម្ពាធត្រជាក់ពីតំបន់អាកទិច ត្រូវគេរំពឹងថានឹងផ្តល់អាកាសធាតុត្រជាក់បំផុតមិនធ្លាប់មាននៅលោកខាងលិច រាប់ចាប់តាំងពីឆ្នាំ១៩៨០មក។ នេះបើតាមការចុះផ្សាយដោយអង្គភាពព័ត៌៌មានអាកាសធាតុរបស់សហរដ្ឋអាមេរិក។ 

ជាក់ស្តែង សូម្បីតែរដ្ឋ Florida ដែលជារដ្ឋទទួលបានអាកាសធាតុក្តៅពីព្រះអាទិត្យច្រើនជាងគេ ក៏នឹងត្រូវទទួលរងនូវអាកាសធាតុត្រជាក់មិនធ្លាប់មានក្នុងអំឡុងពេល ៣០ឆ្នាំចុងក្រោយផងដែរ។ ភ្នាក់ងារឧតុនិយមជាតិ បញ្ជាក់ថា អាកាសធាតុត្រជាក់ខ្លាំងប្រមាណ -៥០ហ្វារិនហៃត៍ (-៤៥អង្សារសេ) រហូតដល់ -៧០ហ្វារិនហៃត៍ (-៥៦អង្សារសេ) នឹងអាចកើតមានឡើងនៅចុងសប្តាហ៍នេះ តាមបណ្តាផ្នែកខ្លះនៃសហរដ្ឋអាមេរិក។

អាជ្ញាធរនៃរដ្ឋ Kentucky និងរដ្ឋ North Carolina ក៏បានប្រកាសពីការប្រកាសដាក់រដ្ឋស្ថិតក្នុងស្ថានភាពអាសន្នផងដែរ ចំពោះបញ្ហាអាកាសធាតុចុះត្រជាក់ខ្លាំងនេះ៕